Innangarðs og utan: söfnun á jaðrinum  

Safnasafnið og Nýlistasafnið leiða saman hesta sína í samstarfi við Norræna húsið og blása til málþings  um söfnun á jaðrinum, umhverfi safna með sértæk markmið og söfnunargildi – hvert hlutverk þeirra sé innan vistkerfi lista og hvert þau stefna. 

Erindi flytja:

Margrét M. Norðdahl, stofnandi Listvinnslunnar, í stjórn Listar án landamæra og áður í stjórn Safnasafnsins

Sigríður Regína Sigurþórsdóttir, safneignarfulltrúi Nýlistasafnsins

Elísabet Gunnarsdóttir, formaður stjórnar Myndlistarmiðstöðvar og forstöðumaður Listasafns ASÍ

Oddný Eir Ævarsdóttir, heimspekingur, skáld og dagskrárgerðarkona

~ stutt hlé með hressingu ~

Pallborð:

Auður Jörundsdóttir, forstöðumaður Myndlistarmiðstöðvar

Helga Lára þorsteinsdóttir, safnstjóri safnkosts RÚV og einn fulltrúa Safnaráðs

Sigurjón Baldur Hafsteinsson, prófessor í safnafræðum í Háskóla Íslands

Ingibjörg Jóhannsdótttir, safnstjóri Listasafns Ísland

Stjórnendur og spyrlar eru Sunna Ástþórsdóttir (formaður stjórnar Nýlistasafnsins) og Unnar Örn Jónsson (myndlistarmaður og stjórnarmaður Safnasafnsins)

Málþingið verður þýtt og textað á ensku í rauntíma.
Aðgengi að Elissa (salur) er gott. Aðgengileg og kynhlutlaus salerni eru á sömu hæð.

Nýlistasafnið og Safnasafnið eiga það það sameiginlegt að hafa áunnið sér sess sem frumlegar skapandi stofnanir hvers hlutverk er að mæta vöntun í söfnun og miðlun hérlendis og líta til allra átta í leit sinni að listamönnum og verkum sem falla að söfnunar- og sýningarstefnu þeirra.

Þingið er hugsað sem sjálfstætt framhald málþings sem Safnasafnið hélt árið 2018 í Þjóðminjasafninu og bar heitið Frá jaðri til miðju. Þá var lögð áhersla á þróun og stöðu alþýðulistar hér á landi. Strax í kjölfarið var ljóst að þörf er á að halda á lofti orðræðu tengdri listsköpun jaðarhópa og þeirra listamanna sem falla utan „stóru listasögunnar“, en einnig hvort og á hvaða hátt söfnunarstefna safna hér á landi tekur til hugmynda um margbreytileika, jafnrétti og jafnræði. Með málþinginu er ætlunin að taka upp þessa þræði og leggja áherslu á söfnunarstefnu sem lýtur að verkum sem teljast til jaðarsins í samtímanum.

Ef það var þannig árið 2018 að jaðarinn var tiltölulega vel skilgreind eining, sem væri að nálgast miðjuna að einhverju leyti, þá mætti segja að í dag séu þessar hugmyndir óræðari. Það er erfiðara að koma auga á hvar miðjan hættir og hvar jaðarinn byrjar, eða þá hvort þessi hugtök eiga enn rétt á sér. Listamenn af ólíkum toga vinna nú saman ólíkt því sem áður var og í dag er rík krafa um að aðferðir söfnunar, og dagskrárgerðar, taki betur mið af þörfum ólíkra hópa. Á málþinginu verður lagt upp með að stofna til samtals sem horfir til margslungins samtíma með sérstaka áherslu á þau tækifæri og áskoranir sem lítil söfn með sértæka söfnunarstefnu glíma við og það umhverfi sem þeim er búið.