Karen Ellemann er stjórnmálamaður með víðtæka þekkingu á sviðum sem vega þungt í norrænu framtíðarsýninni til ársins 2030. Hún hefur verið jafnréttisráðherra, umhverfisráðherra og félagsmála- og innanríkisráðherra. Auk þess hefur hún nokkrum sinnum verið sá ráðherra í Danmörku sem hefur farið með málefni norræns samstarfs.

„Framkvæmdastjóri Norrænu ráðherranefndarinnar hefur mikið að segja um framgang framtíðarsýnarinnar fyrir norrænt samstarf um að Norðurlönd eigi að verða sjálfbærasta og samþættasta svæði heims fyrir árið 2030. Karen Ellemann er afskaplega hæf til þessa starfs og við hlökkum til samstarfsins við hana“, segir Anne Beate Tvinnereim, samstarfsráðherra Noregs.

Karen Ellemann er menntaður grunnskólakennari og sinnti ýmsum stjórnunarstöðum í einkageiranum áður en hún haslaði sér völl á hinu pólitíska sviði árið 2005. Hún hefur einnig verið í forystu fyrir Norræna félagið og sýnt mikinn áhuga á norrænu samstarfi. Karen Ellemann hefur heldur ekki hikað við að segja skoðun sína umbúðalaust þegar henni finnst að norrænu löndin geti unnið betur saman.

„Ég er mjög ánægð með það traust sem mér er sýnt. Í ljósi heimsástandsins er norrænt samstarf mikilvægara en það hefur verið í mörg ár. Ég horfi þess vegna til þess með eftirvæntingu að takast á við þetta ákaflega spennandi verkefni ásamt öllu norrænu samstarfsfólki í Kaupmannahöfn og í stofnuninni sem starfar um öll Norðurlönd“, segir Karen Ellemann.

Karen Ellemann tekur við starfi framkvæmdastjóra Norrænu ráðherranefndarinnar af Paulu Lehtomäki.