Varðbergsfundur með James G. Foggo aðmírál

James G. Foggo, aðmíráll, yfirmaður flotastjórnar NATO í Napólí flytur fyrirlestur í Norræna húsinu 16. október kl. 17, opinn fundur og allir velkomnir

Svör NATO og bandalagsþjóðanna við breyttri strategískri stöðu og hernaðarlegri þróun á Norður-Atlantshafi

James G. Foggo (f. 1959) er bandarískur aðmíráll sem hefur frá 20. október 2017 verið yfirmaður bandaríska flotans í Evrópu auk þess að stjórna bandaríska flotanum í Afríku og sameiginlegri flotastjórn NATO í Napólí. Hann stjórnar heræfingu NATO Trident Juncture 2018 í Noregi.

Foggo útskrifaðist frá Flotaháskóla Bandaríkjanna árið 1981 og lauk meistaranámi við Harvard-háskóla og háskólann í Strassborg, Frakklandi. Foggo varð kafbátaforingi í bandaríska flotanum og hlaut viðurkenningu árið 1998 fyrir stjórn sína á árásarkafbátnum USS Oklahoma City.

Hann hefur gegnt margvíslegum trúnaðarstörfum í herstjórnum Bandaríkjanna og NATO meðal annars innan bandaríska herráðsins og Evrópuherstjórnar NATO. Hann var æðsti yfirmaður 6. flota Bandaríkjanna og síðan framkvæmdastjóri flotaherráðs Bandaríkjanna áður en hann tók við núverandi stöðu.