Lína Langsokkur! Erindi & umræður

Lína Langsokkur á sér langa sögu á íslensku leiksviði, lengri en mörg gætu haldið. Þessi fjöruga og ákveðna stúlka birtist íslenskum lesendum fyrst í bók árið 1949. Þaðan ferðaðist hún norður til Akureyrar og stökk á atvinnuleiksvið árið 1970. En leikhúsræturnar liggja dýpra og má rekja til Leikfélags Kópavogs áratugi fyrr þar sem apinn Herra Níels lék stórt hlutverk.

Þannig hefur hver kynslóð fengið að upplifa sína eigin Línu í gegnum fjölbreytta miðla: Bækur, skjái, tónlist og leiksvið. Lína langsokkur varð órjúfanlegur hluti af barnæsku landsins. Í tilefni 80 ára afmæli Línu er tilvalið að ræða uppruna hennar, höfundinn Astrid Lindgren og áhrif þeirra beggja á Íslandi.

Sigríður Jónsdóttir sérfræðingur á Leikminjasafni og leikhúsgagnrýnandi fer í gegnum áhugaverða sögu uppsetninga á þessu vinsæla verki og birtir gullmola úr arkívi Landsbókasafnsins og víðar. Silja Aðalsteinsdóttir bókmenntafræðingur, rithöfundur, ritstjóri og þýðandi, stiklar á stóru um áhugaverða ævi Astrid Lindgren. Að loknum erindum verða umræður með Sigríði Jónsdóttur, Silju Aðalsteinsdóttur og Agnesi Wild,  leikstjóra nýjustu uppsetningar af Línu Langsokk í Þjóðleikhúsinu. Umræðurnar verða leiddar af bókmenntafræðingnum og leikkonunni Maríönnu Clöru Lúthersdóttur, sem sjálf hefur reynslu af því að stíga á stokk sem  Frú Prússólín í uppsetningu á Línu í Borgarleikhúsinu.

Stutt pása verður fyrir umræður og tilboð verður á léttum veitingum hjá Plöntunni Bístró sem gestum er velkomið að taka með sér inn í sal.

AÐGENGI: Barnabókasafnið er aðgengilegt fyrir hjólastóla frá Hvelfingu sýningarrými. Starfsfólk bókasafns gefur góðar leiðbeiningar. Á aðalhæð hússins er lyfta sem leiðir niður í Hvelfingu og á sömu hæð er salerni aðgengilegt hjólastólum, öll salerni hússins eru kynhlutlaus. Rampur leiðir frá bílastæði að Norræna húsinu. Viðburðurinn fer fram á íslensku.

Viðburðurinn er gestum að kostnaðarlausu og öll eru velkomin!