Barnabókaflóðið

SÝNINGAROPNUN- Komdu í ferðalag um furðuheim barnabókmenntanna í Norræna húsinu

Haldið ykkur fast því sýningin Barnabókaflóðið opnar í Norræna húsinu laugardaginn 29. september. Það verður opið hús frá kl. 15-17 og aðgangur er ókeypis. Öllum skapandi krökkum og aðstandendum þeirra er boðið að vera með á opnuninni og fá svo hressingu í salnum á efri hæð hússins. Barnabókasafnið verður að sjálfsögðu opið með bækur, spil og skemmtileg leikföng – og ef veður leyfir er gaman leika í kringum húsið og borða nesti í gróðurhúsinu. Sjáumst í Norræna húsinu!
Sýningartími Barnabókaflóðsins er 29. september 2018 – 30. apríl 2019. Aðgangur ókeypis.

Barnabókaflóðið er ævintýraleg gagnvirk sýning fyrir börn aldrinum 5–11 ára sem býður upp á ferðalag um furðuheim barnabókmenntanna
Sýningarsalur á neðri hæð hússins. Aðgangur er ókeypis. 

Barnabækur byggja brýr

Sýningin Barnabókaflóðið byggist á virkri þátttöku gesta. Sjálfur Miðgarðsormurinn leiðir börn í skapandi ferðalag úr einu rými í annað. Barnabækur byggja brýr og ferðalangar búa sér til vegabréf sem þeir stimpla í á hverjum viðkomustað. Börnin fá að taka þátt í að skapa stórborgarpúsl, raða landanöfnum á heimskortið, skoða kort af raunverulegum og ímynduðum stöðum úr barnabókum og hnoðast á risahnetti.

Hetjur eru allskonar

Í listasmiðjunni „Hetjur eru allskonar“ er persónusköpun barnabóka í forgrunni. Þar skapa börn sínar eigin sögupersónur og geta mátað sig í mismunandi hlutverkum með grímugerð. Ævintýraþyrstir bókaormar geta síðan skriðið inn í bókafjall. Í fjallinu leynist skáldamjöðurinn og þar fá börn að leika sér með orð og semja eigin ljóð. Þar er líka spennandi bókakrókur til yndislesturs.

Ævintýrasigling á barnabókaflóðinu

Gestir sýningarinnar sigla á vit ævintýra í víkingaskipi og geta jafnvel hlustað á upplestur. Fjársjóður er falinn á eyðieyju og börn fá að skrifa flöskuskeyti. Í sögugerðarsmiðju fá börn tækifæri til að skrifa og teikna eigin sögur og svara nokkrum spurningum í bráðskemmtilegum barnabókaspurningaleik. Dregið verður úr lukkupottinum við sýningarlok í mars 2019. Vinningshafar fá auðvitað bókagjöf.

Við erum öll geimverur

Inn af sögugerðarsmiðjunni er myrkvaður hellir fyrir hugaða ferðalanga. Í myrkrinu leynist ýmislegt. Geimurinn fer með ímyndunaraflið á flug og í lok könnunarleiðangurs um barnabókaflóðið er hægt er að leggjast niður og láta sig dreyma innan um stjörnuþokur og svarthol.

Heimur barnabóka hefur margt spennandi fram að færa. Yndislestur getur m.a. flutt lesendur á nýjar slóðir, virkjað ímyndunaraflið, bætt orðaforða og stuðlað að aukinni víðsýni og samkennd. Lestur er lykillinn að lærdómi en það getur verið árangursríkt að ýta undir lestraráhuga barna í gegnum leik og sköpunargleði.

Þátttaka barna felst m.a. í:
Búningaleik
Vegabréfagerð
Stórborgarpúsli
Sögupersónugerð
Ljóðagerð
Upplestri
Flöskuskeyti
Sögugerð
Spurningakeppni
Slökun
Leik, sköpun, fróðleik og upplifun

Sýningin og viðburðadagskrá tengd henni er framleidd af Norræna húsinu í tilefni af 50 ára afmæli hússins.
Listrænn stjórnandi sýningarinnar er Kristín Ragna Gunnarsdóttir rithöfundur og teiknari.
Framleiðandi er Dagskrárstjóri Norræna hússins Kristín Ingvarsdóttir.

Samstarfs- og styrktaraðilar:
List fyrir Alla, https://listfyriralla.is/
Krumma, http://www.krumma.is/
Reykjavík Bókmenntaborg UNESCO, https://www.bokmenntaborgin.is/
Flügger litir, https://www.flugger.is
Rauði Krossinn, https://www.raudikrossinn.is/

 

Sýningin hentar einkar vel fyrir börn á aldrinum 6-10 ára. Börn undir 6 ára aldri þurfa að vera í fylgd með fullorðnum.

Í sýningarrýminu gildir eftirfarandi:

  • Við förum úr skónum
  • Það er aðstaða fyrir nestispásu við innganginn, en ekki inni á sýningunni
  • Barnavagnar bíða frammi

Fyrir skólahópa

BARNABÓKAFLÓÐIÐ er ævintýraleg gagnvirk sýning fyrir börn aldrinum 5–11 ára sem býður upp á ferðalag um furðuheim barnabókmenntanna. Sýningin er opin frá 29. september 2018 – 30. apríl 2019.  Listrænn stjórnandi sýningarinnar er Kristín Ragna Gunnarsdóttir rithöfundur og teiknari, framleiðandi er Norræna húsið.

Í tengslum við sýninguna eru skipulagðar vinnustofur fyrir börn í 4. bekk og leiðsagnir fyrir skólahópa í 1.–5. bekk. Fyrirspurnir vegna Barnabókaflóðsins sendist á info@nordichouse.is Allar bókanir skulu gerðar með amk viku fyrirvara.